留院

新一輪化療係13號正式開始，今次比上次密，兩星期兩針，休息一星期再打，計劃打4-6個療程。

點知原來我係少數民族，明明今次隻葯比上一次無咁毒，點知我既反應同一般人唔同，打一針嘔足一星期，結果入左院吊鹽水。打埋第二針仲誇張，要入院輸血，白血球同血小板大跌到危險水平，依家係醫院已經被隔離了一星期。無計，惟有當自己返左荷蘭住下酒店吧！

好彩自己一間房，外面又有海境，就當休養下，加上呢幾日凍左，係呢度點都安全啲。

任務完成

身體雖然抱恙，但仍然能夠完成任務，所以我覺得意志能改變一切，只要你相信，你就能成功。

昨天又一位好姐妹出嫁，其實我地呢班同學仔，佔左三分二既另一伴都係自己既同學，換言之，我地個個都識左廿年或以上，感情好就唔洗再講。

天公造美，陽光普照，係呢個無煙城裡，見證了他們既最感人一刻，攪到我都忍唔住喊，不過呢D係開心既眼淚，有感情既人先會明白，所以我覺得絕對唔會影響我病情，反而係一種支持！多謝你哥斯拉，我一定會戰勝新一輪挑戰，你地一定唔會等太耐！

中學時既李 sir ，可以話係我一生會有記著既老師，人與人之間有好多野都無得解釋，就因為咁，我D中文特別叻 ( 我指讀書時，哈哈！)。仲記得他結婚時，他個花球都係我接到！昨天他亦是席上客，而他跟我說的鼓勵話，收到了！堅強！？原來我由細到大都俾人呢種感覺？無論幾難既野，我都會處理到？似乎我無得望反轉頭，今次又要做清兵了！

化療

經過一連串三司會審後，最終都係再上戰場，繼續下一場杖。

今次唔再返政府醫院打了，因為點都要自費，咁惟有係外面碰碰運氣。今次選擇了岑信棠教授，雖然他都係用化療，但他給我的感覺就好似之前見到 Dr Tai 一樣，可能祂的安排，Dr Tai 退休了，卻給我遇上這位岑醫生。

老實講，醫生同病人確實有種好微妙的關系，你信就一定得。有時都唔知係咁岩還是什麼，Dr Tai 十月退休，我就十月復發，天意？還是我心理作怪呢？

回歸主題，呢次我已經要豁出去，短期復發既病人，數據上可以話係存活率不高，但既然我還活著，為什麼要放棄？面對龐大既醫藥費，好無奈，所以糧餉有限，呢場杖只可以速戰速決！

下星期二正式開戰！God Bless Me! Amen

光敏治療

即日來回廣州原來對我而言已經是很吃力的，今次不得再認叻了！

今次返大陸原因係想搵一D alternative 既治療方法，之前經朋友介紹已經叫我去試，但當時剛做完化療同手術，邊有諗過咁快又返黎，仲要變做第四期，下下都快成咁，點招架？

香港醫生只是叫我做化療，但已經唔係治愈，只係盡量拖得幾耐得幾耐，況且化療既副作用係人都知，我仲頂得幾多次？我唔想真係好似個醫生所講，打到打唔到為止，老實講，呢D說話真係好難聽，有病既人當然心中有數，沒有說話技巧既人，他們未經歷過，亦無權係旁邊多說話。

上網做了D search ，感覺呢隻 PDT 都有D科學根據，講到底，能否醫好都係要靠自己。錢是搵黎用，唔識洗錢既人，又點會識搵錢？感恩呢刻我仲有咁既能力，咁無理由我要放棄，對嗎？

衪給你的恩典已足夠你用！

凡事包容，凡事相信，凡事盼望，凡事忍耐。愛是永不止息。

 

 

因為身體起了變化，當然是唔理想個種，現在是十月，正好如上年這些時間，似乎我漫長既戰爭又要再次開始。

 

每當身體有問題時，當然又會走去上下網，搵呢樣個樣，今次當然唔例外。主要看下D私家醫生 comment ，果然我呢科岑信堂醫生同陳子敏醫生都有名。結果咁岩俾我見到 " 楊過 " 既 blog，寫得好有意思，其實原來有好多人，平生都無咩壞習慣，癌症都會搵上門，只因基因突變，而呢樣就正正是我患病的原因。

 

Why me? 這個已經不再是我們的問題，因為既已是事實，如何面對才是我們應有態度。

 

呢段期間，好感受到什麼是患難見真情，好遺撼，一直在旁鼓勵我的並不是簽字人。

 

中國人好避諱平安紙呢樣野，不過我覺得我有這個需要，因為我的愛好想俾我所愛的。