終點

終於要行到呢點了，有人會不捨，有人會難過，有人會不能接受，但我自己卻心中平安。也許這條路已經走了很久，路有起點，自然就會有終點。不同之處，相信只係長或短。

蠟燭

呢星期身體一直都好唔舒服，尤其痛症，就算食幾多止痛藥都好似起唔到D咩作用，感覺再一次迷失，究竟天父你既心意係點呢？我真係無辦法明白…

有位傳道人亦是癌症戰士，他離開時就把生命形容為蠟燭，不論支蠟燭長或短，只要能發光發亮就係一支好蠟燭。無錯，正如人生一樣，不論長或短，只要活得精彩就足夠。

基因

今日係耶穌基督被釘十架後三天復活的日子，這説明基督為我們而死、復活、得永生。

我！？其實我都死過三次，但似乎未係時候回天家，所以繼續尋找未完的使命。早前做既基因報告出左，原來我真係唔屬於呢度，歐美既基因竟然係我身上發現到，仲要係同安祖連娜既一樣，原來我係鬼婆！？

既然揾到患癌既主要成因，係呢組BRCA1 出現問題，咁下步可以點做呢？歐美其實已有一隻新標靶藥針對呢方面既基因突變，可惜香港仲未批准使用，仍然係試葯計劃中，所以我個醫生嘗試同我申請做亞洲白老鼠，如果成功，我好有可能成為香港第一個試驗品。

無論結果如何，有機好過無機，能否復活，只能交托給天父！

復活節渡假

個幾星期前打完第二針，終於可以結束26日既醫院生涯，雖然都預左回家後仍然會有不適，但始終都係在家千日好。回家後，痾左四日，腳都軟埋，諗住停左痾可以休息下，點知快樂時光真係過得特別快，四日後又開始發燒。元氣都未回，又有新挑戰，微燒諗住係正常反應，點都要去埋好姐妹個婚禮，但中途都頂唔順要分上下兩場，其實我已好感恩。

結果到了尋日，發高燒到39.2，後日就係復活假長假期，都係搏唔過，返醫院渡下假。可知道，對化療中病人黎講，發燒係好大件事，所以我一返到黎，簡直又係VIP待遇，即刻入住無敵大海景，望住IFC + ICC 既獨立隔離病房，睇黎呢個假期可以好relax 咁過。哈哈哈！

出院

住院4星期，今天終於可以正式出院了，可惜剛剛收到個傷心消息，我公公剛剛走了。

人生無常，住院咁耐，見到不少病友離開，內心真的有點感傷，而呢刻公公走了，我仍在醫院，最後一面都見唔到他，不過我相信他是很安詳地安息主懷裡，他終於可以同婆婆在天家重聚了！我會永遠懷念你的五柳魚！

回家渡假

住院三個幾星期，身體慢慢好轉起來，感謝主！祂又再次救了我一命，似乎仲未係時候返去，應該係係地上既工作尚未完成。

醫生見我一切都幾好，而且又未到期打第二針，所以決定俾我回家渡假。古人說話真係無錯，龍床點都唔夠狗屋舒服，回家渡假兩日，人生三大基本需要食、瞓、痾，全部正常，感覺太美好了！

回家後決定要做晨運，原來樓下既公園一早真係好熱鬧，所以自己唔會覺得好奇怪。

現在又返回醫院，等待第二針，希望一切順順利利！

生日

今日係我35歲生日，看來又是一個關口。人一出世，即生日，就是在醫院，而今年的我，竟然回到出世生日的地方⋯醫院過生日。本來諗住有機會可以出院過生日，可惜條腸仲係唔太聽話，結果安全理由，醫生還是建議唔好出院好啲。既然如此，我自己亦唔想太辛苦，留係度過生日亦不是太差。

剛才突然發燒，有啲擔心明天既生日聚會。其實政府醫院雖然環境無私家好，不過配套一定好過私家好多。好似今日咁，對於我地呢啲長期病患者，支援尚算不錯，醫院還特別為我安排一間房同家人一聚。

從前無病無痛既時候反而都未試過要同家人過生日，但當你已經掌權唔到自己生命時，親情比任何野更珍貴。

盼望

今次腸塞入院至今已經第十四日，足足兩星期。感覺？可以有咩感覺，只能每天盼望，插住胃喉，兩星期都無食過野，每天望住啲美食相，望梅止渴，滿足下自己的食慾。

其實已經好感恩，昨天等到頸都長既大便終於走了出來，連護士長都為我興奮，嗰刻其實我只識得感謝主，因為祢真的聽到，凡事盼望，祢必眷顧！

仲有三日就生日了，有睇開我個blog 既朋友都會知我好重視自己311的生日，本來訂好機票去北海道玩，不過依家應該會係醫院渡過了，但好感激一班醫護人員，他們可以讓我跟屋企人係呢度過生日，其實人來到這世界的一刻根本什麼都沒有，當離開時亦如此。所以我感恩呢刻，我身邊有愛我既親人朋友，所以我並非什麼也沒有。

生有時，死有時

自從初四入院後，看到身邊病友一個又一個離去，雖然我並不認識她們，但總叫同路人，突然間都感到自己生命已有限期。

我對於死亡沒有太大恐懼，一直我都感到好平安，因為我有主同在。只是過程中往往會令人難以忍受，尤其痛症，辛苦到呼吸唔到，個肚脹到快要爆開，呢刻我只希望自己快快離開，我真係無力行落去。

依家又展轉黎左瑪嘉烈醫院，港九新界都住過了，呢間會否係我最後一間醫院呢？姑娘問我仲有咩心願，其實肉體走了，但靈魂仍然在大家心中，我又點會孤單？放心不下還是昇仔吧...

雙癌細胞？

無諗過兩年內會咁幸運中兩種癌症，真係有刻會問自己，是否自己一直都攪錯左自己性別？原來自己並非一個女兒生？

老實講，長久戰鬥真的令自己既意思開始消沈，但我又可以點做呢？

大年初一食過野後，我已經無食過野，只能靠飲奶維持，個肚痛到瞓唔到，應該又係腸塞的徵兆。轉去私家睇，但啲錢真係好似倒水咁，都未正式醫，已經用左差不多十萬，往後的日子點算？

人生路

自從有病之後，其實生活上真係起左好多變化，尤其以前既我好鍾意一起身就開住部電腦，到依家我基本上無乜特別需要，我都唔會用部電腦。但係原來當你自己覺得生命倒數時，意志開始下沉時，身邊人會同你講，咁你咪去做你自己想做既野囉！呢刻，我先開始係度諗，究竟一直以來，我自己既人生路最喜歡做什麼呢？

活左差不多35年，頭20年當然就係讀書，無咩特別，但記憶中，自己由細到大都唔太鍾意讀書，除非有D題目我自己有興趣，記得中學時，最鍾意就係中史，原因係金庸既小說，仲要不斷搵野史黎看，所以我諗我自己都幾鍾意尋根！:)

之後的10年，基本上已經賣命俾左航空界，雖說話就話飛黎飛去，但我始終去唔到兩極，而我真正去到既地方亦不算多，結果不經不覺又浪費左10年。

到左人生30出頭，仲記得時下人會標籤左我地呢D叫中女，30歲個年，結果去左埃及做開始，短短兩年間，變化太大，由好似叫多姿多彩既生活，突然180度改變，是福還是禍？我仲未總括到。面對、接受、處理、放下…我以為經歷了兩年，自己起碼可以做到第三點，但我發現最近，我好似又返轉頭去到起點！連基本既面對都好似未好好掌握到。

身體既痛楚越來越利害，有刻我會問自己，不如放棄啦！咩都唔好再做，因為要做既都做左，死亡其實對依家既我，根本並不可怕，但生不如死，每天都受痛症折磨，呢種感覺先係最辛苦。

但身邊好多人都叫自己努力撐落去，因為仲有昇仔，可惜畢竟我只係一個普通的凡人，雖然我真係好想過正常生活，但有時連氣力都無，痛得只能訓係張床度，呢刻想到昇仔，我更感無奈。

也許，我是雙魚座，感性的我又再出現，成日為自己諗到若行到最後一刻時，自己要點樣點樣，真係頂自己唔順！

老實講，我真係唔想再返醫院，返到去又要聽他們無感情既說話，聽完又會令自己唔開心一排，而且他們又唔係幫到自己，點解依家會有咁多呢D不負責任的無情醫生！好討厭！

哈哈！真係好耐無試過係個blog度吹咁耐，寫咁耐，條腸就痛足咁耐，想點呀！？激死人！不過我無咩野可以留返俾昇仔，希望呢D點滴，可給他將來一些回憶！( 不過男仔同女仔真係未必相同，可能他根本一D興趣都無) :P

https://www.facebook.com/video.php?v=845034088887053

早前同I-cable 拍左段片，寫左係呢度，希望將來仲可以看得到。

白老鼠

2015年主力做白老鼠，因為病情又失控了，政府醫院已經用晒可用既葯，之後再用既方法只有重覆再用之前用過既葯，不過我既身體仲可以捱多幾多次？而抗葯性問題，真係值得再去咁重覆再做嗎？可能呢刻，我要追求既已經係quality of life 而並非quantity of life !

所以最後都係選擇左去私家做白老鼠，同時亦意味著開始燒錢。我唔知道咁既決定是否正確，但我唔想只係坐係度咩都唔做，等到最後一天，雖然做白老鼠都未必一定成功，但至少我有努力過，而且至少可減低身上既痛楚。

早兩星期試左隻基因針，5千蚊一次，可惜都係失敗，今天再試隻5萬蚊一次既PD1 新葯，未知會否成功，希望唔洗再試50萬一次既葯，到時真係有，我都無能為力。

又一次

2015年又要開始一場硬仗，今次能否撐得過？我唔知道，但有了經驗，心理上會容易理解一啲。

剛見完醫生，無錯，啲野又再次捲土重來，葯已經用晒，似乎又要用返第一次既葯，有無成效？無人知道，係醫生立場，拖到幾耐就幾耐，啱既，只要仲能呼吸一口氣，我仲有機會生存落去。

最近煲完來自星星的你，突然有啲啟發，哈哈，可能我都係來自金星。

唉，喊完果然個腦運轉得唔太好，都唔知自己係度寫乜，都係休息下。