挑戰

自從有左呢個病之後，每日醒來都係一個新挑戰，因為我唔會知道自己起身時身體會出現咩問題，甚至我可能一睡不醒，有誰知？

呢輪既化療已經打到第四針，今次啲頭髮並非一次過甩晒，不過每日甩一大堆，結果我每日就好似垃圾婆咁，個頭揮一揮，滿地皆落髪，日掃夜掃已成為我每天必定的工作。其次就係痛症，手腳痛症已習慣，但肚痛真係煩，食完即腸痛，有得痾都無咁驚，無得痾又怕再次腸塞，到了今天，輪到條腰了，救命呀！真係痛到嘔，原來人家話痛到嘔，真係有根據！

原來上次東區醫院既醫生話我得返一年命，限期已到，雖然7月時真係差啲走左，不過我好感恩，限期雖然到，但我仲未被招回，可能上帝想我係呢度做多啲見證先返天家。

今年如無意外，應該可以打晒六針，眼見身邊同病者打一輪就好返，我有時真係唔明，究竟我係咪真係來自金星？點解地球既葯對我起唔到作用？或者有日真係要走轉金星，揾下醫我既葯先得！哈哈哈！

久違了

自從入完廠後，身體都時好時壞，無咩心機，頭髮不斷甩已習慣左，手腳麻痺已適應了，但今次輪到隻眼，唔知咩事，又紅又痕，睇左兩次醫生都未好，依家全日帶著墨鏡先叫好少少，有時痕到想挖對眼出黎。

白血球已經肥左兩次佬，換句話又delay 左兩星期打針，心情真係好down，好怕又好似上次咁，癌細胞反彈，呢刻我真係唔知可以點樣令自己relax 啲！下星期一又返醫院，希望今次白血球合格啦！

指數

被隔離的感覺真係⋯第一次住個隔離病房咁誇，好似SARS 病房咁，鬼叫打完化療出蛇，其實都唔知係好事還是壞事，依家連探病都唔可以。唉！就當休息下，俾自己一個人靜下。但在醫院始終瞓得唔多，依家又眼光光望天光了！

無諗過原來之前癌指數去到8千幾，難怪我咁辛苦，依家跌到4千幾，都叫有啲作用，希望真係會好起來。

自從洗左禮之後，個人真係平靜左好多，睇事都放開左。執著係我一生最唔好既野，依家盼望主能改變我。阿門！

生蛇

落完化療葯本來都無咩特別唔舒服，點知幾個鐘後突然生蛇，睇黎想出院既機會又要推遲了。不過換轉另一個角度睇，有反應總好過無反應，一切交托，祂會為我安排，我還是乖乖地係度用下政府資源。

無啦啦出蛇，應該都係免疫力問題，所以被人隔離了，唔洗住大房，依家住獨立房，自人靚view，upgrade 左都唔錯丫！哈哈！

機會

明天會打第二針化療，希望真係有效，醫生話呢隻係最後可用既葯，成功率得3成，若果失敗，真係一切交俾上帝了！

呢刻說不出自己心情係點，住院都半個月，究竟我幾時先有機會過返正常既生活呢？

雖然心中呢刻已經無話咩好唔捨得，但我唔想咁樣就過埋去，生命長短我控制唔到，但怎樣過我都仲想有自主權。可以嗎？

又一星期

又瞓唔著，咁惟有繼續寫。

今天好感恩，因為整天沒有好大痛楚，肚脹問題都好似唔見左。主，祢真係與我同在！阿門！

原來入左院又一星期了，究竟幾先可以離開這張食瞓痾既床呢？呢刻我要忍耐，我地唔知道祂既安排，不過我地有平安。

星期六日醫院又係無野做，下星期先再安排第二針既化療，求主保守一切順利。

由於太耐無食過野落肚，今日真係忍唔住食左隻雞脾，當然只係「食」，落肚就仲未有呢個福，但總叫過下口癮都好。

失眠

夜欄人靜又不能入睡，感覺又像無了期的等待。

呢幾日身體都好反覆，插住胃喉都仲好啲，但一旦除去，又嘔又痛真係好難受。已經3星期無食過野，下一針既化療葯打唔打到呢？

求主醫治，我真的累透了，呢刻我還是活在當下！

願望

在病床上基本上無咩野可以做，只望望身邊的病友，一出一入，有些被轉去等待病房，內心都會不是味兒。

人生走到呢步，可以望既就是病房裡的一切，我唔想。但每當你搬動你的身軀時，你所付出的能量更是千倍萬倍。

我真係好想好起來，我只希望可以過返啲正常少少既生活。這個願望奢侈嗎？

距離

死亡既距離越來越近了，昨晚突然腸脹劇痛，又嘔又失禁，call 白車直入醫院。那刻的折騰，我真的想就咁就離開，我真的好辛苦。

我不知道自己還能活多久，似乎這個不由我自主。雖然明白人生無常，馬航兩班機，五百幾人，他們又能自主自己個死亡距離嗎？

入了院，打了嗎啡，總叫舒援了一點點。昨晚我都為自己身後事簡單作了個安排，呢刻我只能靜靜地等待。

想喊

好感恩身邊有一大班好友每天都在支持我，可惜身體每日差落去，自己都好無奈。痛楚一日比一日多，依家連食、行、坐咁基本既野都做唔到。

腸塞問題連醫生都幫我唔到，我只能默默忍受，盼望神蹟再次出現。化療葯既副作用開始浮現，意味我又要承受多一種痛苦，皮膚開始爛，但點解我總是與人不同？點解我爛既地方都比其他人複雜？

老實講，我已經忍受到超越自己既能力，我唔知道自己仲可以撐到幾耐？每當好痛同無助時，我都好想喊，但喊左亦解決唔到個問題。我好辛苦⋯我唔知自己可以點做？

感恩我的路

當醫生同我講，癌細胞已走遍了整個肚皮下，我沒有好難過，或者我已經有了心理準備，只希望唔洗再咁痛同辛苦。人可以做到既真係好有限，我只有盼望神蹟會否再降臨我身上。

1. 人總會有一天離開這個暫居地，我只希望自己唔好帶著遺憾而走。好感恩在呢段日子裡，親人朋友沒有離棄我。人既一生總會有不如意既事，我體會了，剩下來的，就交給醫生好好為我治療。阿門！

累

新一輪化療昨天正式開始，啲葯除左越打越貴外，仲越打越辛苦。

尋日一落針，只不過是40ml，我已經即刻出疹，本來兩個鐘既葯，結果打左半日。雖然現在已經四點幾，我已經好累，但仍然瞓唔到，因為又痾又嘔。呢兩星期無咩點食過野，已經輕左2kg，我仲可以捱到幾耐呢？

又黎過

我呢個病真係沒了沒完，上一年仲好有鬥志，但今次醫生又話我知，「他」... 又失控了！我累了！新一輪既戰鬥又要再開始，年半裡面用第三輪化療，一次比一次貴，政府醫院都要萬五蚊一針，我仲可以捱多幾多次？

今次因為痛楚已兩次入院，已經要用到嗎啡去止痛，但似乎對我無咩作用。老實講，用意志止痛比用藥物止痛更有效。

昇。願

母親節前夕，終於完成了這首歌。祝願各位媽媽母親節快樂！

在此，特別多謝 maggie's center 既鍾sir 同鄭姑娘，估唔到我呢個五音不全既人，可以作到一首屬於自己既歌！哈哈哈！

這首歌係送俾昇仔，內容就俾大家去意會一下！

《昇。願》

路迷迷惘惘，昇燃亮著我
你令我無懼，你令我釋放
不知何年何月會走過
但我卻仍然在你身邊

愛你疼你永不止，可惜時間卻很短
只愛聽   歡笑聲，不愛看   淚面臉
當你走過暗幽谷，恩典從來沒間斷
若有天   軟弱時，遙望天上繁星
就在那不遠處   媽媽  守護你

四月

最近真係無咩心機去 update 呢個 blog ，可能身體上真的比從前差，所以每一天都只希望可以多見昇仔幾面。

早幾日，終於遇到一位婦科腫瘤專科醫生，他個名仲要只差昇仔一個字，哈哈，是天意嗎？是主你派 Dr Sing 黎醫我嗎？他跟我說，其實我個病唔難醫，但想不到，他會問我是否睇過岑教授？原來當初東區突然改左岑教授offer 我既第二輪化療藥，而又唔洗自費，可能就因為他的 refer letter !? 可惜這套藥對我反應太 大，打到我入左兩次醫院。結果頂唔順，要返黎我主場。

Dr Sing 跟我解釋，其實我不應在未夠一年就用同一隻化療藥，不過可能岑教授名氣太大了，結果醫院亦 follow 左他。可惜，這正正影響了我現在的治療，因為我的指數又慢慢升了，若然上年年尾無打個兩針一線藥，現在就可以重用！唉… 我個病究竟還要拖多久？主呀…你可告訴我嗎？或者你這樣的安排，總有你想我明白的地方！？

又大一歲，又活多年

311 呢組數字，相信大家唔會陌生，然而對我來說，更是認識了34年，今年的311，沒有什麼節目安排，但能與自己最親的人渡過，簡單的一餐飯已經很足夠。

兩年前的我能夠這樣輕談自己既牛一嗎？以我呢為雙魚座的女生來說，當然不能！不過，人大了，經歷過後，原來真係會改變。但到現在，除了我父母外，這一位 “親人”，相信是我畢生來最錫我的人，多謝你！

有身皆苦，我的病又再次反覆，究竟這條路我還能走多遠，我自己都不知道。但路未完時，我也會走下去！

雙料情人節

通常新年氣氛到了元宵就會暫告一段落，今年既新年對我黎講已經有很大不同！至少今年我仍有點力氣同精神，到朋友家拜年，好感恩！

昨天是雙料情人節，中西同一日，仲記得從前，每逢呢D敏感日子，我寧願返工渡過，估唔到今年都唔例外，一早就 " 返工 "，地點屯門醫院，工作打化療！老實講，呢種生活有時真的令我好無奈，儘管到了呢刻，有時我都會問：「究竟仲要打幾耐？」

今次返去見埋寧養姑娘，其實她們的出發點是好的，因為做人要有兩手準備，積極樂觀固然重要，但相反，沒有為自己個病作些打算，到最後時可能會帶著遺憾，而她們的工作就是呢樣，好讓我無遺撼走到最後。大家嘗試諗下，以我呢個年紀去聽呢D安排，個心係咪仲有點唔舒服！？不過我都在她們的電腦上，同意了在最後的時候，無須再為我急救，不要讓我的痛苦延續下去。

寫信！？姑娘提議我寫一些信件給我的家人，其實我一向都喜歡寫些日誌，但為了個病，寫下“遺誌”，大家又覺得怎樣呢？若然人已逝，那就將一切成追憶，放不下，才是最痛苦！

唔知我呢個部落可以到幾時呢？若干年後，唔知有無我想他看的人會出現呢？一切都隨緣吧！將一切交托給祂！

雙料情人節要19年先一次，即下次會係2033年，我相約你 JP

同時，人人新舊曆生都應該每19年就相遇一次，而我偏偏就不是，下一次雙料生日要到57年後，即2037年，我也相約你 JP

年尾

仲有三日就過年，回想一年前，感覺就好似無耐之前咁！

三星期以來，白血球都肥佬，明天個針又打唔到，所以根本唔洗我向醫生請假過年。有時候真係唔知係好事還是壞事，始終我本人唔多想打咁多化療，總希望可以用天然既方法醫好個病，當然係醫生立場會希望你盡快打晒所有化療，但換來的是你身體會有更多毒藥！

中國人話，新一年就唔會再犯太歲，希望身體健康，早日過返正常生活！

靈丹妙藥

今日有幸可以去到馬場，仲要係馬主廂房食自助餐，又俾我增廣見聞下，好開心。

大家相信開心就係靈丹妙藥嗎？由聖誕開始，一路嘗試俾自己過返D正常生活，參加多D朋友聚會，雖然身體比從前一定係差左，體力上也沒有從前那麼好，不過，我仍然活得好開心。

前兩個星期又有成績報告，非常感恩，癌指數由二千幾跌到去三百幾，Peggy 你要加油，距離目標不遠了！

其實最近試左樣 supplement ，Nuskin 既 tegreen ，明顯上每次打完化療後，白血球都無跌太多，究竟呢隻 supplement 係咪真係有用？等我再繼續以身試藥，之後再同大家分享。

老實講，以我地呢D 病人 黎講，化療係毒藥係人都知，若然有D 天然少少既野可以試，而又對個病有幫助，為何不試？從前我都唔多好呢D supplement ，總係覺得呃人，否則個會籍都唔會係99 年開左後到依家，仲要俾公司凍結埋。諗返起都幾好笑，就好似本聖經咁，好早就已接觸，但中途放埋左一邊，依家先知係寶！人生就係咁，走到好似盡頭時，又發現走返轉頭。

2014

Happy New Year! 新年快樂！

踏入新一年，希望大家新一年活得更好！

13-14 一生一世，走過一生，進入一世！唔知這八個字對大家有咩感覺呢？然而，對我來說就很有意義！因為可以由有盡到無盡，感謝主！

13既聖誕到14既元旦，感謝一班好友一一同我渡過，華哥同莪莪既寶寶亦趕得切同我地一齊倒數，這是好的開始，期盼2014一切都是美好的！