挑戰

自從有左呢個病之後，每日醒來都係一個新挑戰，因為我唔會知道自己起身時身體會出現咩問題，甚至我可能一睡不醒，有誰知？

呢輪既化療已經打到第四針，今次啲頭髮並非一次過甩晒，不過每日甩一大堆，結果我每日就好似垃圾婆咁，個頭揮一揮，滿地皆落髪，日掃夜掃已成為我每天必定的工作。其次就係痛症，手腳痛症已習慣，但肚痛真係煩，食完即腸痛，有得痾都無咁驚，無得痾又怕再次腸塞，到了今天，輪到條腰了，救命呀！真係痛到嘔，原來人家話痛到嘔，真係有根據！

原來上次東區醫院既醫生話我得返一年命，限期已到，雖然7月時真係差啲走左，不過我好感恩，限期雖然到，但我仲未被招回，可能上帝想我係呢度做多啲見證先返天家。

今年如無意外，應該可以打晒六針，眼見身邊同病者打一輪就好返，我有時真係唔明，究竟我係咪真係來自金星？點解地球既葯對我起唔到作用？或者有日真係要走轉金星，揾下醫我既葯先得！哈哈哈！