新戰場

經過一年既長途 跋涉，終於決定告別東區，返番自己主場新界西既屯門醫院。可能有好多人都會覺得點解有港島區醫院唔去，反而要走去屯門醫院？但對我黎講，新界先係我既地方，我本應就係屬於呢度，過去既一年，離鄉別井，身心都飽受煎熬，或者我註定要做個鄉村女，回來我感到好舒服。

老實講，自己個病心中有數，但我無放棄自己，只要每天起床，無痛無唔舒服，行得食得痾得，我已經好滿足，活在當下吧！當然，我好明白自己屋企人既擔心，好希望我繼續用藥，唔好放棄。但作為當事人既我，一個辛苦完兩星期化療、嘔足兩星期、入院兩次…結果！？癌指數仲要升左一倍，我真係有刻問自己，為乜？

屯門呢度既醫生都好老實同我講，他們會盡量配合我既意願，因為我個病要控制真係有難度，而且我身體狀況真係好難講，上次化療後白血球低到得 0.4幾，真係有危險，所以他們都會同我減藥。減藥對於我地黎講，其實並不是件好事，不過想太多亦無咩意思，呢刻我只能將一切交俾衪，相信衪早已為我預備。

好多謝一直 有睇我個 blog 既朋友，我都好希望你地一路都睇到我既sharing ，我仲未想封筆住！因為我仲有好多野想分享！至少俾我環遊完個世界先啦！哈哈！